7Liwa

إيهاب إقبال، أو كيف كيعرفو جمهور الراب بإسم حليوة، هو رابور ولد الدار البيضاء تزاد ف 1996، بدا كيهتم بالراب ف2011 كان متتبع لبزاف ديال روابة فالخارج وفالمغرب، ومن بينهم المورفين اللي كان فان ديالو.
ف2013 غادي يبان حليوة بأول أغنية سميتها الضحك تقادا، اللي دارلها كليب ومن تم الجمهور المغربي غادي يعرف موهبة جديدة تزادت للراب المغربي، من بعدها غادي يبان فواحد الفريستايل مع بزاف ديال الروابة من الدار البيضاء والرباط من بينهم دانجر و الجاسوس…
وفنفس العام حليوة غادي يطلق أغنية أخرى اللي زادت تقلات الكفة ديالو فميزان الراب، الأغنية سميتها بطل العالم من ميكستايب كتابي باكي، تقريبا 11 دقيقة د يال الراب دبالصح، الپونشلاين الإستعارات وبزاف ديال التقنيات فالكتابة اللي خلات الطراك لدابا يولي من كلاسيكيات الجيل الجديد ديال روابة جداد.
ف 2014 غادي يزيد يكمل فالستيل ديالو غادي يخرج أغاني بحال موسيقة الشيطان، فليتس، وزاوا المدينة من بعد غادي يسمح فالميكستايب اللي لاح منها بطل العالم، وف2015 غادي يبدا ميكستايب أخرى اللي كيخرج منها أغنية بأغنية سميتها ولد فاطمة اللي جات اعتراف للواليدة ديالو اللي عاوناتو بزاف باش يمشي فالراب، أول أغنية خرجات من هاد الميكستايب كانت سميتها ولد فاطمة، تبعها بأخرى سميتها نيك ديطي، و تعاون مع السبعتون فأغنية 77، من بعد خرج منها أغنية تفو، فهاد الوقت كان متبعو واحد رابور فرنسي من أصل مغربي سميتو لارتيست اللي اقترح عليه يخدم معاه فألبومو الرابع كلانديستينو، بالفعل حليوة خدم معاه فجوج أغاني شوفور كاپابل و ڭونزاليز اللي زادي فالشهرة ديالو فالمغرب وعلى برا.
حليوة كان مركز على الميكستايب ديالو خرج بزاف دالأغاني من بعد بحال أديداس فنهاية 2016، وفبداية 2017 خرج هاريبو ومي يامور مع ڭروب أ6ڭانڭ، من بعد غادي يعلن على أنه بدا الخدمة فألبوم جديد اللي اختارلو سمية سيفن وأول أغنية منو كانت سميتها كمي كمي كمي مع دريزي.